Судот во Сибир го осуди антивоениот активист Илја Бабурин на 25 години затвор под обвинение за велепредавство кое произлегува од наводите дека 24-годишникот планирал да запали неколку воени центри за регрутирање.

Бабурин, кој исто така беше прогласен за виновен за подметнување пожар во музичко училиште и учество во активностите на украинската крајнодесничарска вооружена група Азов, ги отфрли сите обвиненија.

Видете и ова:

Руски антивоен активист осуден на 15 години затвор

Затворската казна на Бабурин е најдолгата затворска казна што му е изречена на антивоен активист во Русија.

Десетици активисти во Русија се осудени на затворски казни за подметнување пожари врз воени центри за регрутирање откако Кремљ ја започна својата инвазија врз Украина во февруари 2022 година.

Армијата на Демократска Република Конго спречила обид за убиство на претседателот Феликс Чисекеди во Киншаса, јави Би-Би-Си.

Се наведува дека во обидот за атентат во главниот град биле вмешани конгоански и странски борци.

Генералот Силавин Екенге, портпарол на армијата на Конго, изјави дека се приведени 50 осомничени, меѓу кои тројца Американци и еден британски државјанин.

Претходно тој на државната телевизија РТНЦ изјави дека ситуацијата е под контрола.

Генералот и се обрати на јавноста неколку часа откако вооружени лица упаднаа во домот на Витал Камерхе, поранешен началник на кабинетот и близок соработник на претседателот Чисекеди. Се додава дека очевидци изјавиле дека група од околу 20 напаѓачи во воени униформи влегла во резиденцијата и дека дошло до пукање.

„Потоа двајца чувари и напаѓачот беа убиени“, рече портпаролот на Камерха.

Напаѓачите ја окупираа и Палатата на народите и канцеларијата на претседателот во центарот на градот, која беше специјално обезбедена од Републиканската гарда.

Видете и ова:

Претседателски избори во Конго

Претседателот Чисекеди досега јавно не ја коментираше ситуацијата.

Локалните медиуми објавија дека напаѓачите биле членови на Движењето на Нов Заир, поврзани со Кристијан Маланг, поранешен конгоански политичар во егзил.

„Маланга беше убиен во претседателската палата откако се спротивстави на апсењето“, рече генералот Екенге.

Неговиот син Марсел Маланга е меѓу тројцата американски државјани уапсени за наводниот обид за државен удар.

Амбасадорката на Соединетите Држави (САД) во Конго, Луси Тамлин, рече дека е шокирана од наводите дека Американците можеби учествувале во обидот за пуч.

„Ве молиме, бидете уверени дека ќе соработуваме со властите на Конго додека го истражуваат ова злосторство“, напиша Тамлин во објавата на X.

Претседателот на Африканската унија Муса Факи рече дека остро го осудува обидот за државен удар.

Претседателот Чисекеди го започна својот втор мандат минатата година во декември, кога освои околу 78 отсто од гласовите на спорните избори. Речиси 20 луѓе беа убиени во насилствата пред изборите.

Портпаролот на Европската Комисија во изјава за бриселскиот портал „Еурактив“ вели дека Договорот од Преспа меѓу Грција и Северна Македонија од 2018 година мора да биде спроведен од „сите страни“ и со „добра волја“, во услови на нова заострена реторика меѓу Атина и Скопје.

Порталот потсетува дека новата дипломатска криза меѓу двете земји избувнала откако новата претседателка на Северна Македонија, Гордана Сиљановска-Давкова, за време на нејзината инаугурација на 12 мај ја нарече земјава „Македонија“ наместо Северна Македонија, кое е официјалното уставно име по договорот за промена на името со Грција во 2018 година, познат како Договор од Преспа.

Видете и ова:

Сиљановска-Давкова положи заклетва и порача: Време е за единство

Од своја страна, Европската Комисија вели дека „сите страни“ треба да се држат до договорот.

„Добрососедските односи и регионалната соработка остануваат суштински за процесот на проширување. Постојните билатерални договори треба да се спроведуваат со добра волја од сите страни, вклучително и Договорот од Преспа меѓу Северна Македонија и Грција“, изјави портпаролот на Европската Комисија за „Еурактив“.

Видете и ова:

Скопје и Атина пак „се фатија“ за името

Инцидентот, како што забележува „Еурактив“, предизвика реакции низ Европа и САД, при што многумина стравуваат од заживување на 25 годишниот спор меѓу двете соседни земји.

Милитантната група Исламска држава ја презеде одговорноста за нападот на вооружени мажи врз туристи во централната авганистанска провинција Бамијан.

Во нападот кој се случи на 17 мај загинаа тројца шпански туристи, а најмалку еден беше повреден, соопшти шпанското Министерство за надворешни работи.

Абдул Матин Кане, портпарол на Министерството за внатрешни работи на владата предводена од Талибанците, изјави дека четири лица се уапсени во врска со нападот.

Видете и ова:

Напад во Авганистан - неколку убиени, меѓу нив и странски државјани

Според Кане, покрај тројца странски туристи, загинал и еден авганистански државјанин, а повредени се четворица странци и тројца Авганистанци.

Бамијан е дом на место за светско наследство на УНЕСКО во кое се сместени останки од две џиновски статуи на Буда, кои беа урнати од Талибанците за време на нивното претходно владеење во 2001 година.

Во Индија денеска (20 мај) почна петтата фаза од парламентарните избори од вкупно седум, а се одржуваат во финансискиот главен град Мумбаи и големите индиски држави Утар Прадеш и Одиша.

Во петтата фаза 89,5 милиони гласачи избираат 49 пратеници.

Изборите почнаа рано утринава за да им се овозможи на гласачите да ги избегнат жештините бидејќи Индија ја погоди топлотен бран.

Видете и ова:

Во Индија почнаа парламентарните избори кои ќе траат до 1 јуни

Парламентарните избори во Индија почнаа на 19 април, право на глас имаат 968 милиони Индијци, што е повеќе од вкупното население на САД, Европската Унија и Русија заедно.

Изборите за 543 членови на Долниот дом на парламентот се одржуваат во седум фази до 1 јуни на повеќе од еден милион избирачки места низ земјата.

Гласачките ливчиња ќе се пребројуваат на 4 јуни, а резултатите ќе бидат објавени истиот ден.

Според проценките на парламентарната комисија за финансии, владата на Обединетото Кралство, по бројните одложувања, ќе мора да потроши најмалку шест милијарди долари за спроведување на граничните процедури по Брегзит.

Британците гласаа за напуштање на Европската Унија во 2016 година, но дури оваа година беа донесени нови правила за гранични контроли за да продолжат да функционираат синџирите на снабдување, пренесува Ројтерс.

Првата фаза, која подразбира воведување дополнителни сертификати, стапи на сила на 31 јануари. Втората започна на 30 април со воведување на физички контроли во пристаништата. Третата фаза, која вклучува безбедносни декларации, е закажана за 31 август годинава.

Видете и ова:

Анкета: Повеќе од половина Британци сакаат назад во ЕУ

Комитетот наведува дека Владата проценила дека ќе и бидат потребни шест милијарди долари за 13 главни мерки кои треба да овозможат проток на стоки преку граница и да се подобри спроведувањето на тие мерки во иднина.

Владата пет пати го одложи спроведувањето на целосните гранични контроли од завршувањето на преодниот период за напуштање на Унијата на 31 декември 2020 година.

Ова предизвика несигурност во деловната заедница, додаде трошоци за владата и пристаништата и ги зголеми ризиците за биосигурност во Обединетото Кралство.

Тајванскиот претседател Лаи Чинг-те побара од Кина да ги прекине своите воени и политички закани, велејќи во својот инаугуративен говор дека мирот е единствениот начин и оти Пекинг мора да го почитува изборот на тајванскиот народ.

Обраќајќи им се на насобраните луѓе пред канцеларијата на претседателот во центарот на Тајпеј, Лаи рече дека сака да разговара со Кина, која го гледа островот како своја територија и никогаш не ја отфрлила употребата на сила за да го врати под своја контрола, пренесе Хина.

„Исто така, ја повикувам Кина да престане политички и воено да го заплашува Тајван и да преземе глобална одговорност заедно со неа за одржување на мирот и стабилноста во Тајванскиот теснец и во регионот, за светот да не мора да се плаши од избувнување на војна. Ние исто така сакаме да му соопштиме на светот: Тајван не прави компромиси за демократијата и слободата. Мирот е единствениот пат и нашата цел е долгорочен мир и стабилност“, истакна Лаи.

Видете и ова:

Кина испрати десетици воени авиони над Тајван

Засега нема реакција од Кина, која го нарече Лаи сепаратист пред изборите во јануари.

Лаи (64), кој ја презеде функцијата од поранешната шефица на државата Цаи Инг-вен, чиј потпретседател беше во изминатите четири години, рече дека луѓето мора да бидат реални и да ги сфаќаат сериозно заканите и оти Тајван мора да покаже дека е решен да се брани.

Тајванското Министерство за одбрана во денешниот дневен извештај соопшти дека шест кинески авиони ја преминале линијата во средина во Тајванскиот теснец, која претходно служела како неофицијална граница, но Кина не ја признава.

Русија погоди одморалиште во близина на Харкив и ги нападна околните села, при што загинаа најмалку 11 луѓе, а повеќе се повредени.

Ракетните напади се најнови во серијата континуирани руски напади во последните недели врз регионот на вториот по големина град во Украина во североисточна Украина, каде руските сили започнаа офанзива.

Украинскиот претседател Володимир Зеленски повторно ги повика западните сојузници да испратат дополнителни системи за воздушна одбрана во Киев за да го заштитат Харкив и другите градови.

Видете и ова:

Напади со дронови во Русија и Украина

„Светот може да го запре рускиот терор, а за да се направи тоа, мора да се надмине недостигот на политичка волја меѓу лидерите“, напиша Зеленски на Телеграм.

„Два Патриота за Харков можат да направат темелна разлика. Системите за противвоздушна одбрана за другите градови и дополнителната поддршка за војниците на фронтот ќе го осигураат поразот на Русија“, додаде Зеленски.

Русија ја започна инвазијата врз Украина на 24 февруари 2022 година.

Основачот на Викиликс, Џулијан Асанж е на чекор од одлуката која би можела да доведе до негова евентуална екстрадиција во Соединетите Држави, кои го бараат по обвинение од 18 точки за објавување на стотици илјади доверливи документи.

Судот во Лондон се очекува да одлучи дали САД ги исполниле бараните гаранции пред да одлучи дали да дозволи нова жалба.

Минатиот месец, Високиот суд во Лондон пресуди дека, без одредени американски гаранции, на Асанж ќе му биде дозволено да поднесе нова жалба против екстрадицијата. Тие гаранции вклучуваат дека во случај на судење во САД, Асанж ќе има право да се повика на првиот амандман и правото на слобода на говор, и дека нема да има нови обвиненија кои би можеле да доведат до смртна казна. Документот до кој имаше увид Ројтерс ги потврдува овие гаранции, отворајќи го патот на судот во Лондон да одлучи за негова екстрадиција.

Според сопругата на Асанж, Стела, судот би можел да одлучи да дозволи екстрадиција, да му даде дозвола да се жали или дури да го ослободи.

"Џулијан би можел да биде екстрадиран или да биде ослободен. Важно е да се запамети дека ова трае повеќе од пет години. Џулијан цело време беше во најозлогласениот затвор во Велика Британија. И седум години пред тоа во Еквадорската амбасада една година и во домашен притвор, всушност, секој ден од 7 декември 2010 година е во еден или друг облик на притвор“, вели неговата сопруга.

Таа додаде дека Асанж се бори да преживее во затвор и дека доказите за неговото ментално здравје укажуваат на сериозен ризик од самоубиство.

Видете и ова:

Британскиот суд ја одложи екстрадицијата на Асанж во САД

Педесет и двегодишниот Асанж, кој се наоѓа во затворот Белмарш, планира да присуствува на сослушувањето.

Одлуката би можела да стави крај на правната битка на Австралиецот што трае повеќе од 13 години во Британија. Пред да оди во затвор, Асанж помина седум години затворен во малата еквадорска амбасада во Лондон, каде што се засолни за да избегне екстрадиција во Шведска под обвинение за сексуален напад. Овие обвиненија подоцна беа отфрлени.

Откако му беше укинат еквадорскиот азил во 2019 година, тој беше затворен поради кршење на условите за кауција, а Соединетите Држави го започнаа процесот на екстрадиција. Американските власти велат дека неговите постапки биле непромислени, наштетиле на националната безбедност и ги загрозиле животите на агентите. Неговите поддржувачи велат дека обвиненијата се напад врз новинарството и слободата на говорот.

Минатата недела американскиот претседател Џо Бајден рече дека го разгледува барањето на Австралија да се откаже од кривично гонење, што адвокатот на Асанж рече дека е „охрабрувачки“. Волстрит журнал, исто така, објави дека се водат дискусии за потенцијален договор за признавање вина. Доколку судиите се согласат на екстрадиција, само интервенцијата на Европскиот суд за човекови права би можела да ја блокира. Но, судот веќе двапати ги отфрли барањата на основачот на Викиликс.

Потсекретарката за јавна дипломатија и односи со јавноста во американскиот Стејт департмент, Елизабет Ален, во разговор за СДК вели дека САД го поддржуваат Преспанскиот договор со Грција и дека се разочарани што претседателката Гордана Сиљановска-Давкова не го користеше уставното име Северна Македонија при инаугурацијата.

Потсекретарката Ален, која викендов беше во посета на Скопје, не сака да прејудицира што би се случило ако новата влада реши да не го почитува Преспанскиот договор.

Ален денеска со посетата на Северна Македонија ја заврши турнејата низ земјите на Западен Балкан, при што ги посети Босна и Херцеговина, Србија и Косово.

На прашањето на СДК што би се случило ако новата македонска влада реши да не го почитува Преспанскиот договор со Грција, дали и што САД ќе променат во поддршката за Македонија, Ален изјави:

„Се разбира, ние го поддржуваме Преспанскиот договор и бевме разочарани кога видовме дека претседателката не го користи целосното и формално име Северна Македонија. Ќе следиме да видиме што прави владата. Во постојан дијалог сме со владата која е во тек на формирање. И затоа, тука не би прејудицирала никакви последици, но, секако, би се надевале и охрабруваме дека лидерите на Северна Македонија ќе се придржуваат до меѓународните договори“.

Видете и ова:

Сиљановска-Давкова положи заклетва и порача: Време е за единство

Претседателката Сиљановска-Давкова не кажа Северна Македонија туку само Македонија при заклетвата на инаугурацијата во Собранието на 12 мај. Следниот ден, во соопштение од нејзиниот кабинет кажаа дека таа свечената заклетва ја потпишала со уставното име на земјата, дека претседателката ќе се придржува до официјалната примена на уставното име, но дека „има право да го употребува името Македонија во своите јавни настапи, како чин на лично право на самоопределување и самоидентификација“.

Видете и ова:

Скопје и Атина пак „се фатија“ за името

Претходно и од амбасадата на САД во земјава порачаа дека остануваат цврсто посветени на Договорот од Преспа и на евроатлантските интеграции на Северна Македонија. од амбасадата рекоа дека откако ќе се формира нова влада и ќе се избере премиер, ќе продолжат да ја зајакнуваат важноста на почитувањето на меѓународните договори и придобивките од напредокот на државата со полноправно членство во Европската Унија.

Пораки и потсетувања за почитување на договорот од Преспа стигнаа и од Европската Унија. Од грчка страна, пак, не стивнуваат острите реакции и предупредувања дека Северна Македонија нема да има напредок во евроинтеграциите ако новата влада не го користи уставното име на државата.